"Crije" di san Magno a Caraglio
(testo e grafia piemontesi)
2001	2002	2003
2004	2005	2006
2007	2008	2009
2010	2011

	LA CRIJA 'D S. MAGN DËL 2001
Son torna sì con ël baston an man fiorì, mach për conteve quat bale an alegrìa. Lo seve lòn ch'i càpita 'n costi di? Tuta la gent a parla 'd na "pazzia".
	Diso tuti che son mate le vache e la notissia l'é 'dcò rivà là 'n cel, tuti ij sant son sagrinà, oh giache, S. Magn sa pì cò disne ëd tant rabel!
Nosgnor l'ha pensa bin ëd campé n'euj sla tèra e l'ha vist che n'àuta bestia 's dimenava, ma j'era nen la vaca, né la bera, j'era l'òm che për gnente s'agitava.
	L'ha dit fra 'd chiel: "Ma varda sti tupin, smija che chèidun bele-là giù s'argala. Për colpa d'un sapient un pò pì cretin, na vaca l'é malavia e fan massé la stala!".
Ma lassoma perdi për ancheu ij sagrin, përchè për ël sang gram l'oma temp tut doman. Fòrsa Bastian, Giusep, Flipòt, Giaco e Gioanin, foma 'n pò 'd festa 'nsema con ël bicer an man!.
	Aorelio Pellegrino   6/5/2001

	LA CRIJA 'D S. MAGN DËL 2002
Fòrsa veni, brava gent përchè 'ncheu mi son content e vardeme bele-sì ël baston an man fiorì.
	L'ann ëd l'euro l'é arivà, ij centesim se fan stra, ma con l'euro o con la lira mi son plà a l'istessa mira!
Festegioma sì dosman ël patron 'd tut ël bestiam. L'é S. Magn ël protetor, Morisiasch ël neuv prior.
	Con le vache che dan làit fesse ij sòld a l'é prest fàit e për sò chiel veul paghé ai present un bon disné.
Feve avanti, fòrsa su ël bicer a va vempù e beivoma 'n alegrìa co'j massé dla Companìa.
	Aorelio Pellegrino   10/4/2002

	LA CRIJA 'D S. MAGN DËL 2003
A l'é passà n'àutr agn, vardeme torna sì, për festegé S. Magn con ël baston fiorì.
	Che tanta bela gent mi vedo bele-sì! Seve tuti content? Content e bin ardì?
Con l'"euro" coma và? L'eve capì chicòs? Sarà coma sarà ma son ridòt a l'òss.
	E dij polìtich peui l'é mej nen parlé, l'é machi tut n'ambreuj e 'd tasse da paghé.
Fòrse l'é mej torné a fé 'n pò d'alegrìa për nen fé magoné sta bela companìa.
	Ël neuv prior, l'han dime, l'é pì nen dla Paschera, l'é "Ciccio" Claudio Aime che ven da la Valera.
L'é 'n campagnin ardì con tante bestie a stala, 'd fruteto a l'infinì e con ij faseuj s'argala.
	Dòp d'avèj tant parlà l'é vnume 'n pò 'd gatij, su domje na copà e che tut sia finì.
	Aorelio Pellegrino   4/5/2003

	LA CRIJA 'D S. MAGN Caraj - 2/5/2004
Festa gròssa 'ncheu a Caraj! L'é përchè l'han bagnà j'aj? Ij potent l'han bassà 'l tasse? Jë stipendi a son aussasse?
	Nò gavevlo da 'n la testa, ancheu l'é 'd S. Magn la festa! L'é dle bestie 'l protetor përciò fomje 'd grandi onor.
I é 'dcò 'l cambi dël Prior e mi co 'l baston an fior fass j'auguri a col che ven ëd n'avnì a cel seren.
	La Michelin chiel l'ha lassà për torné a la veja stra che l'é cola dla campagna sempre stàita soa compagna.
Beh, alora brava gent coma l'é ch'a tira 'l vent? A vedive anche sta vòta a më smij tuti 'n piòta.
	E alora domje 'n taj pensi nen sempre al travaj. Foma festa, fòrsa, alé che së speta 'n bon disné!
	Aorelio Pellegrino

	LA CRIJA 'D S. MAGN Caraj - 10 avril 2005
Bondì e cereja a tuti, cari amis! Salute j'eumi e ij gagno dël pais, ma pì che àut le fomne mi salute, basta che sìo pròpi nen tant brute!
	E torna 'ncheu san Magn l'é festegià e për soa protession va bin laudà. Chiel da lassù a guerna 'l bestie nòste, sperand che 's salve 'dcò da neuve impòste!
Ora l'é mej parlé dël neuv Prior sicur che për chest ann as farà onor. As ciama Mario Aime e 'l sò soris a l'é lì sempre pront sota ij barbis.
	L'é nà a Entracque tanti ani fa ma a chiel pianté patate a-j piasìa pa. Segnà oramai a l'era 'l sò destin: veni a Caraj për fé ël granatin.
L'ha 'n bel negòssi adess 'd piante e fior e 'n pì a l'ha dë smens 'd tuti ij color. E 'ncheu speroma che, da amis ver, chiel eufre a tuti noi 'n bon bicer.
	Veuj saluteve, o bela companìa. Arvëdse e mantenive 'n alegrìa. Viva san Magn e viva 'l neuv Prior e che Nosgnor vë scampe dai dotor!
	Aorelio Pellegrino

	LA CRIJA 'D S. MAGN Caraj - 30 avril 2006
Sël cher 'd San Magn vardeme torna sì, tut ësticà con ël baston fiorì. Ve parle ora dij nòsti polìtich? L'é mej 'd nò, se nò më s-ciòpa 'l fìdich!
	Ve parle dël gran beuj ch'a-i é 'nt ël mond për ësti quat fabiòch che, vagabond, lor mando sempre j'èiti a massesse, mentre 's ne stan tranquij sensa esponisse?
Nò, veuj nen roviné costa bela giornà, parloma ancheu dël sant sì festegià. A l'é San Magn dle bestie ël protetor che travajavo al pòst dij trebiator.
	Adess për tajé melia e bati ij gran, Gian Mario Bianco a-i é ch'av dà na man. A l'é 'd San Magn ormai ël neuv Prior e chiel për chest impegn as farà onor.
Na vòta, mincatant, ën po' dë sfròss, chiel andasìa a fé 'n pò 'd motocross. Adess chiel preferiss në spòrt nostral: andé a spass con ël sò bel caval.
	A fòrsa ëd parlé dël pì e dël meno ël temp a l'é passà pì lest d'ën treno. E alora veuj finì co'n bel cin-cin e dësmentioma për ancheu ij sagrin!
	Aorelio Pellegrino

	LA CRIJA 'D S. MAGN Caraj - 22 avril 2007
Bondì, cereja, tòte e madamin. Bondì, cereja a j'eumi e a le masnà. Fiorime a l'é 'l baston e pròpi bin, veul dì che chest l'é n'ann tant fortunà!
	Speroma che san Magn, sant protetor ëd tute chëlle bestie dla campagna, st'ann sì protege 'dcò ël neuv Prior e lo preserve da ògni magagna.
So nòm? As ciama Mario Pelegrin. Na vòta ël camionista chiel l'ha fàit, però prima ëd fé ël contadin ënt la fàbrica dla plàstica l'é 'ndàit.
	Fà ora cò l'alevator dij tòr e 'd pì l'ha sent giornà da coltivé, magara l'avrà 'dcò na giornà 'd pòr tant bon da bagné 'nt l'euli e peui mangé.
Mariuccia ij di dla festa e ij di 'd mercà lo pòrta là sla piassa 'n sël canton parèj peul fé tranquil soa ciaciarà con tuti ij sò amis ëd j'anviron.
	Më smija che ora baste ciaciaré. Ël còl a l'é venume d'ën colp sèch. Viva san Magn e foma festa, alé e che a la fin mi peusse bagné 'l bèch
	Aorelio Pellegrino

	LA CRIJA 'D S. MAGN Caraj - 6 d'avril 2008
Salve a tuti, brava gent mi ancheu son tant content përchè i manca machi eut di e peu basta co 'j partì.
	Vòta 'n sà e vòta 'n là che minestra riscaudà! J'é mach sempre da speré d'ëndé avanti e nen 'ndaré.
Ma content son verament për sta festa, e 'n chest moment ve presente 'l neuv Prior ëd San Magn, nòst protetor.
	Tallone Enrico l'é 'l sò nòm e as dis che a l'é 'm brav òm. Për tanti agn a l'ha cudì sia la tèra che 'l cavial, ma l'ha decidù 'n bel di ëd pì aussesse con ël gal.
Peui l'ha travajà 'n bel pòch an na fàbrica 'd San Ròch. Ma ora basta ciaciaré, l'é na festa o còsa l'é?
	Quindi foma d'alegrìa tuti 'nsema 'n companìa. Se peu 'n bon bicer a-i é noi pudoma 'dcò brindé.
	Aorelio Pellegrino

	LA CRIJA 'D S. MAGN Caraj - 26 d'avril 2009
Cara gent seve sì 'mbaronà, eumi e fomne con vòste masnà, përchè 's veul festegé anche st'ann la gran festa dël nòst brav san Magn.
	Ve presente chi l'é 'l neuv Prior aussand bin ël baston con le fior: Beccaria Secondo se ciama e a ven da Paschera sotana.
Për tant temp a l'é stàit ferovié për podèj guidé ij treno e viagé, ora l'é diventà 'n campagnin, l'ha le nos da cudì për dabin.
	J'auguroma 'd salute 'n baron e che as gòde sent agn la pension. Mach la fomna l'é 'n pò sagrinà përchè chiel gira sempre për ca.
Cari amis a l'é l'ora 'd disné, ògni tant venta vempi 'l giausé. Che san Magn sia nòst protetor e che 'l mond sapia vivi d'amor.
	Ve salute con grand' alegrìa, vivi 'n pas e con tant'armonìa!
	Aorelio Pellegrino

	LA CRIJA 'D S. MAGN dedicà a Mario Bergia Caraj - 18 d'avril 2010
Feve avanti, brava gent, sì 's festegia 'n sant potent, l'é san Magn che l'é 'n valent protetor ëd tuti j'arment.
	Peu veuj feve 'dcò present che j'é sì 'n grand òm valent: l'é 'l Prior che 'n chest moment pija 'l pòst a chel surtent.
Bergia Mario, l'eve present? A mené 'l camio l'era 'n portent. Con ël sò fé sempre sorident tanto gasòlio portava ai client.
	Ora chiel, con vigor ardent, poronine e cossòt a l'ha 'n ment e coltiva con tanto ardiment ste verdure për amis e parent.
Ëd Padre Pio l'é 'dcò 'n grand fervent e lo prega an tuti ij moment. Mario, sùplica sto sant ecelent che con nojèiti sia sempre clement!
	E ora scoteme e deme da ment: andoma a buté chicòs sota ij dent.
	Aorelio Pellegrino

	LA CRIJA 'D S. MAGN dedicà a Marco Musso Caraj - 8 ëd magg 2011
Mè cari amis mi son pròpi content ëd vedi bele-sì 'n bel pòch ëd gent. Venta che sappi che tanti ani fa n'òm barbis chest cher a l'ha creà.
	Sto cher ëd san Magn, tenilo bin a ment, d'agn a l'ha compine bele sent! E për boneur l'é 'nco bin conservà e dai paisan da sempre amirà.
Ma chi l'é st'ann Prior dla Companìa? L'é Marco Muss brav òm, pare 'd famija.
	Travaja 'n fàbrica, ma j basta nen coltiva kiwi, se pòrta fà cò 'l fen. Però a-j pias cò cori su e giù se va a giué a "calcetto", sto monsù!
Auguri 'd bon travaj mè car Prior. Àusso, disand sossì, 'l baston ëd fior: san Magn protege ti e toa famija. Viva sta bela festa e viva l'alegrìa!
	Aorelio Pellegrino